ЖАҢА ЖЫЛЫҢЫЗ БЕНЕН!!!

28 декабрь 2018-жыл

Ҳүрметли  сайт мийманлары!


         Сизди кирип киятырған 2019-Жаңа Жыл байрамы менен шын кеўилден қутлықлаймыз!
Сизге  ҳәм жақынларыңызға беккем ден саўлық, бахыт, ҳәр-бир шаңараққа берекет тилеймиз. Жаңа жылда ҳәр-бир басламаңыз нәтийжели болып, өмириңиз жарқын жаңалықларға, әжайып ҳәдийселерге  ҳәм қуўанышқа толы болсын!!!

Ҳүрмет пенен,
Администрация

 

ЖАҢА ЖЫЛДА

Таўдан аққан булақлардай,
Тарап илим ҳәмме ўақ,
Мың жаңалық дөремекте,
Жалғыз минут өтпей-ақ.

Усы әсир заманының,
Адамымыз биз бүгин,
Келешегим болғай тағы,
Бүгингиден уллырақ.

Жеңис пенен мақтанышлы,
Биз бүгинниң әўлады,
Ел жаңарды, жер жасарды,
Артты Ўатан қуўаты.

Аўыл, қала, жер, суў, дала,
Адам ушын көркейип,
Өз сәўлесин түсирмекте,
Мийнетимиз саўлаты.

Жаңа жылды байрамлаймыз,
Жаңа табыс нышаны.
Бир күнимиз жылдан зыят,
Жыл - әсирдей мысалы.

Шадлы дәўран ҳаўазының,
Жарасықлы сестиндей,
Жаңлап мийнет дөреткишлер,
Мол үлесин қосады.

Секунд пенен минутлардан,
Қуралады жылымыз.
Қол жалғасып ислесемиз,
Биримизге биримиз.

Мәканымның ҳәмме халқы,
Бир шаңарақ болған соң,
Ҳәр бир табыс жуўмақланып
Көркеймекте елимиз.

Бир ҳәриптен барып-барып,
Бир роман қуралар.
Бир гербиштен жалғанысып
Питер бийик бинәлар.

Өз-өзиме есап берсем,
Ўақыт босқа өтпесе,
Ҳадал мийнет баҳаланып,
Ҳалық алдында сыналар.

Өмириме жалғасады,
Тынысымның ҳәр деми
Ўақыт қымбат, ҳәр бир демим ­
Өмиримниң жәрдеми.

Жас ўақытты бос өткермей,
Халқым ушын ислесем,
Ҳадал мийнет даңққа сөзсиз,
Жеткереди тез мени.

Қаҳарманның бир сааатлық,
Ис усылы бир дәстан.
Абырай жақын өз исиңе,
Нәзер салсаң тынбастан.

Жаңа жылда зор жаңалық,
Дөретиўдиң жолына,
Келши достым, ықлас пенен,
Ислесейик ең бастан!
    1952-жыл